Böyük Britaniyada Özbəkistanın sabiq prezidenti İslam Kərimovun qızı Gülnarə Kərimovaya məxsus 2 mənzil və bir malikanə müsadirə olunub.

Sosial.info xəbər verir ki, bu barədə Böyük Britaniyanın irimiqyaslı dələduzluqla mübarizə bürosu olan SFO (Seriuos Fraud Office) məlumat yayıb.

"Ali məhkəmənin qərarı ilə SFO dələduzluğa görə məhkum edilmiş Gülnarə Kərimovanın üç elit obyektinə nəzarəti ələ alıb", - məlumatda deyilir.

Bildirilib ki, müsadirə olunan obyektlər Londonun Belqraviya rayonunda iki mənzil və Surrey qraflığında bir malikanədən ibarətdir. Hər üç daşınmaz əmlakın ümumi dəyəri 20 milyon funt sterlinqdən (25,5 milyon dollar) yuxarı olaraq qiymətləndirilir. Dələduzluqla mübarizə bürosu obyektlərin korrupsiya yolu ilə əldə edilmiş vəsaitlərlə satın alındığını hesab edir.

Qeyd edək ki, Gülnarə Kərimova 2015-ci ildə, hələ atasının sağlığında oğurluq, dövlət vəsaitini israf etmə ilə məşğul olan cinayətkar qruplaşma ilə əlbirlikdə, o cümlədən, vergidən yayınmaqda ittiham edilərək, beş il azadlıqdan məhrumetmə cəzasına məhkum olunub.

2017-ci ildə Kərimova əlavə olaraq azadlıqdan 10 il məhrumolma cəzasına məhkum edilib, lakin daha sonra məhkəmə hökmü azadlıqdan beş il məhrumetmə ilə əvəz edərək, Kərimovanın cəzasını qızının evində çəkməsinə icazə verib.

Lakin 2019-cu ildə Gülnarə Kərimovanın cəzası yenidən sərtləşdirilib və qadın məhkumluq şərtlərini pozduğuna görə yenidən cəzaçəkmə müəssisəsinə qaytarılıb. Həmin ilin avqust ayında ona qarşı dövlət vəsaitinin oğurlanması və xüsusən, iri miqyasda özgə əmlakını talama ittihamları üzrə yeni cinayət işləri qaldırılıb. 2020-ci ilin mart ayında cinayət işləri üzrə Daşkənd Şəhər Məhkəməsi cinayətkar birliyin yaradılması, soyğunçuluq və oğurluq üzrə yeni cinayət işi çərçivəsində Kərimovanın həbs müddətini 13 il 4 ayadək qaldırıb.