Fətullahçı Terror Təşkilatının (FETÖ) lideri Fətullah Gülənin qardaşı oğlu Selman Gülən, həyat yoldaşı, qayınatası və qayınanası ilə birlikdə İstanbul Sancaktəpədə tutulub.
Sosial.info TRT Haber-ə istinadən xəbər verir ki, İstanbul Respublika Baş Prokurorluğu, Mütəşəkkil Cinayətkarlıqla Mübarizə Şöbə Müdirliyi və MİT tərəfindən aparılan istintaq çərçivəsində koordinasiyalı əməliyyat keçirilib.
Belə ki, qaçaq şübhəlilərin 1 ilə yaxındır təşkilatın evində gizləndikləri müəyyən edilib. Şübhəlilərin təşkilatın rəhbərinin göstərişi ilə banka pul yatırdıqları məlum olub. Təşkilatın rəhbər vəzifələrində olduqları da müəyyən edilib.
Həmçinin Selman Gülənin təşkilatın hazırkı maliyyə strukturunda hələ də işlədiyi bilinib. Axtarışlar zamanı çoxlu rəqəmsal materiallar, külli miqdarda xarici valyuta və 2 saxta şəxsiyyət vəsiqəsi də ələ keçirilib.