Xankəndiyə vertolyotların enib-qalxdığı barədə məlumat vermişdik.

Sosial.info xəbər verir ki, bununla bağlı yeni detallar ortaya çıxıb. Ermənistan mətbuatı daha əvvəl iddia edirdi ki, Rusiya sülhməramlıları

Qarabağı tərk etmək niyyətindədirlər və vertolyotla zəruri əşyalar daşınır.

Amma erməni mətbuatı indi başqa iddia səsləndirib. Bildirilir ki, sülhməramlılar vertolyotla özlərinə ərzaq daşıyırlar. Bu haqda Xankəndidəki ermənilər məlumat veriblər və qeyd ediblər ki, sülhməramlılar bunu Azərbaycan tərəfi ilə razılaşdırıblar.

Bu da erməniləri həm qəzəbləndirib, həm də məyus edib. Separatçılar gözləyirmişlər ki, sülhməramlıların ərzağı tükənəcək və onlar Azərbaycan tərəfinə Laçın yolunun açılması üçün təzyiq göstərəcəklər.

Bu gözləntiləri doğrulmayınca, ermənilər qəzəblə rusları tənqid edir, onları yalnız özlərini düşünməkdə ittiham edirlər.

Amma həm də onu başa düşüblər ki, Azərbaycana qarşı hansısa təzyiqlərin olacağına və ya Bakının bu təzyiqlər qarşısında geri çəkiləcəyinə heç bir güman yoxdur.